الثلاثاء، ١٤ يوليو ٢٠٠٩

فركله بونواز


عندي تساؤل..



كلنا شفنا بالصحف خبر هروب السجين الباكستاني بو نواز " ناصر نواز محمد نواز" المحكوم عليه بالإعدام..

بو نواز انحاش منهم بغفلة من الحارس المرافق له عند ذهابه لمراجعة في مستشفى البحر..


لاحظوا..محكوم عليه بالإعدام..يودونه مستشفى البحر يعالجونه..

يعني ماهوا راح يموت ..شناطرين دام صدر بحقه حكم بالإعدام ؟؟ خلاص اعدموه وكان الله غفوا رحيما..

ليش تصرفون عليه وعلى اكله وعلى علاجه وياخذ دور بالمستشفى ويخرع اليهال والمرضى وزوار المستشفى وهو مكبل اليدين والشرطي معاه..

لست رجل قانون..وادري البعض بيقول هاذي حالة انسانية ومادري شنو..اوكي انا معاك ..بس سؤالي شنو معاييراختيار وقت تنفيذ الإعدام؟ ودام صدر الحكم ليش مايتم التنفيذ على طوووول ؟؟!

هناك ١٩ تعليقًا:

ميمة السبيت يقول...

** لازم اسوون اكشن شوي بالديرة

مو احنا ناقصين بعد عشان تطلع سالفة الأخ بو بدر

جرفاس يقول...

ميمة السبيت..

اتصدقين الظاهر جذي حابّين يشوشون على النواب ويطلع الوزير منها سالم =)

enter-q8 يقول...

جرفاس يرحم والديك تكفى اسال اي احد قوله عن الدور بمستشفى البحر متى يحوشه
في عندنا مدون مسكين هذي حالته كل 7 شهور يراجعهم و يعطون موعد ثاني
احسن شي انه ينحكم اعدام جود يعطونه دور بدري

سوق الفرضه يقول...

بس أنا عندي سؤال .... انا بروحي قاعد أشم ريحة رشوه بالموضوع ... ولا في أحد معاي قاعد يشم نفس الريحه ؟؟

مَـــــعْــــمَــــعَـــــه يقول...

ابشرك صادوه واليوم شوف الاكشن بوسائل الاعلام

جرفاس يقول...

Enter-Q8

شفت اشلون ؟؟ وربعنا يبون يشترون المستشفيات الخاصه..اكتر من هيك تخبط شو ؟؟ خلها على الله يبا لكن البركه فينا احنا الجيل الصاعد =)


سوق الفرصه

والله بالبداية شميت هالريحه مثلك لكن ملينا من سوء النية ..خلنا دايم نحسن الظن عشان مانتعب



معمعه

والله ياخوفي انهم افترو بالجليب وصادولهم واحد يشابهه والمجرم تلقاه الحين طاق الوزار بكشمير بين الربايع خو تدري ربعنا دايخين ياخوك..لكن همّن خلنا نحسن الظن دائما وأبداً =)

جنون الكويت يقول...

يمه يخرع ^_^

Yin مدام يقول...

عاد تصدق كنت مع عيالي في مستشفى البحر وكانوا جايبين مساجين وشكله كان واحد منهم !!

يعني إنحاش بنفس اليوم؟

عاد مكلبجين من إيدينهم وريولهم شلون إنحاش؟

مواعيد البحر تلوع الجبد يمكن كان عنده موعد من قبل الحكم بالإعدام وتوة ياه الدور؟؟


عاد عندي شكثر تحلطم على مستشفى البحر وموظفينهم يا ريته وهو طالع كافخ بنات الإستقبال كلهم جود تتعدل أخلاقهم من الخرعة !!!!!

:))

الدســتور يقول...

بالمبارك
صادوه

ولد الديرة يقول...

شوف يا باشا

الإعدام هو الحكم الوحيد اللي يمر تلقائيا بالتمييز بدون طلب من المتهم أو النيابة

يعني اول درجة

استئناف

بعدين اوتوماتيكياً تمييز

لا صدر تمييز بالإعدام

يرفع الحكم لصاحب السمو للتوقيع عليه

عاد هذي فيها طوالة يسمونها Death row


يعني صف بالدور


الداخلية والخارجية والدفاع والأشغال والمواصلات والشؤون ووزارات معالي الشيخ أحمد فهد الأحمد الثلاث كلها ترى سيم سيم

مدئئش يعني

ولد الديرة يقول...

بالمناسبة ترى الناس طايحة الحين طيحة ببو نواز

يتوسط لهم تدري يبون مواعيد

جرفاس يقول...

جمون الكويت

اسمله عليج =) هاذي صورة واخترعتي شلون لاشفتيه جدامج..




مدام

شكلج غطيتي ويه عيالج اول ماشفتيهم ..عموما اهما صادوه الحمدلله يعني مامن شر ان شاءالله..
اما مستشفى البحر..خلينا ساكتين بس..



ابو الدستور

الله يبارك فيك..صج اني مو بالكويت بس انا ما راح اتطمن لمن يعدمونه اخاف ينحاش مره ثانيه =)



ولد الديرة

اشكرك عالمعلومة..حاولت اقرأ عنها قليلا لقيت ان اجراءات الاعدام بالدول الاجنبيه تكلف عشان جذي يصفون بالدور..والمعلومة المفاجئة ان ربع المحكوم عليهم بالاعدام بأمريكا يموتون موت طبيعي بسبب الانتظار والوقت الطويل..بس عندنا بالكويت شنو الحكمه بالـDEATH ROW ..دولة صغيره وعدد الاحكام الصادرة بالاعدام تعتبر قليلة..شخطه قلم من طويل العمر وتنتهى السالفة..


لا تنغر فيه ترى مسكين انا اتوقع انه كان ماخذ موعد بالمستشفى قبل لا يصيدونه ويقطونه السجن وماياه الدور الا قبل الاعدام =)

DiLLi O MiLLi يقول...

ههههههههههه
هذي كانت حجوتي من قريت خبر نحشتة
:)
ليش رايحين تعالجونة وأهو علية حكم أعدام!!؟؟؟
فكونا من شره
يمكن وزير الداخلية خاف لا يستجوبونة النواب أياهم
خووو هذيله ينطرون الشاره عليه
لوووول

:)

جرفاس يقول...

دللي

تساؤل في محله صح ؟ المهم انهم صادوه وان شاءالله يجتلونه ونرتاح منه سوى لويه هالبنجابي

kuwaiti_cool يقول...

الا السؤال ليش مافي مستشفى بالسجن خاص للمساجين
لو قام هالسجين وارتكب جريمه بالمستشفى لا سمح الله حزتها لازم يعدمون الوزير بداله يمكن تبرد الحره ولو ان ربعنا مايتسنعون ولا عندهم دبره

مالوم من قال ديره بطيخ

وشكرا

متزوج 3 وعمري 28 يقول...

غريبة.. الناس مو لاقية مواعيد..
والمجرمين لاقين مواعيد مع بودي جارد فاشل؟
هل تمت محاسبة المسئولين عن الخطأ؟
لا أعتقد..
...
ممكن سؤال؟
ما معنى "جرفاس"؟

malak يقول...

لازم يعيشونه برعب


وبعدين اذا محكوم عليه اعدام ليش ماكو تشديد عشان لا ينحاش



الحمدلله انهم مسكوه :)

صــوت الــمــدامـــع يقول...

الله يكفينا شر هالاشكال

انا بصراحه فقد الثقه بامن هالديره

ماهو ان الرجال ماهم كفو

لكن احس ينقهم كثير من الخبره والتدريب الصحيح

يعني فرق بين عسكرنا وعسكر دوله متقدمه

,^_^,

بدت تحوس الحكي




عواااااافي اخووووي

غير معرف يقول...

You better watch it there mate, after this post, you may be the first on his list

I don't mind offering this man treatment if he needs it, but at this moment, Kuwait's hospitalization services lacks so much that treating this man seems outrageous, especially since many citizens are turned down by overcrowded hospitals

Damn the government to hell